ہمارا فلسفہ

جدید معاشرے میں سیکولر بنیاد پرستی اور مذہبی بنیاد پرستی کے پھیلاؤ نے پوری دنیا کی تہذیبوں کے لیے انوکھے مسائل پیدا کر دیے ہیں۔ تاریخ دان اور ماہرینِ عمرانیات اس بات پر متفق ہیں کہ بظاہر ایک دوسرے سے ٹکراتے نظر آنے والے یہ بنیاد پرستانہ نظریات ایک ہی سکّے کے دو رخ ہیں۔ اس کی وجہ یہ ہے کہ ان نظریات کی بنیادیں مغربی روشن خیالی کی مطلقانہ، ثنویاتی، اور ہر شے کو ہڑپ کر جانے والی منطق میں پیوست ہیں۔ اس منطق نے جدید دنیا کو نہ صرف غیر مذہبی اصطلاحات میں سوچنے کا درس دیا ہے بلکہ ’یا یہ یا وہ‘ کے انداز میں سوچنا سکھایا ہے، جس کو اس جدید محاورے میں بخوبی سمویا جا سکتا ہے کہ ”تم ہمارے ساتھ ہو نہیں تو ہمارے خلاف ہو۔“ ماحولیاتی تبدیلی کے بحران کی طرح، جو کہ پوری دنیا کی قدرتی حیات کے لیے خطرہ ہے، سیکولر بنیاد پرستی اور مذہبی بنیاد پرستی کا یہ بندھن بھی ان بھیانک خطرات میں سے ایک ہے جو اس عالمی گاؤں کی تہذیبی زندگی کو لاحق ہے۔

پچھلے پچاس برس میں ہونے والی پیش رفت نے اس بات کو اظہر من الشمس کیا ہے کہ موجودہ اعلیٰ تعلیمی ادارے بنیاد پرستی کے اس ناسور کی صحیح تشخیص کرنے اور اس کا علاج کرنے میں بالکل ناکام رہے ہیں۔ اس ناکامی کی بنیادی وجہ یونیورسٹی کا وہ ہتک آمیز رویہ ہے جو اس نے روایت کے ساتھ روا رکھا ہے۔ اس صورت حال نے ایک ایسے ادارے کی ضرورت پیدا کر دی ہے جو روایت کی حکمت کو سنجیدگی سے لیتے ہوئے جدیدیت کے بحران کے بارے تحقیق کرے اور اس کا علاج کرے۔

اکیشیا ایجوکیشن فاؤنڈیشن ایسا ہی ایک ادارہ بنانے کے لئے کوشش کر رہی ہے۔